Taxane warbixinno ku saabsan "Safarkii Yurub ee" Abwaan Maxamed Xaashi Dhamac"Gaarriye" Bilada Nabada iyo Gaarriye Xarunta Cilmi baadhista Soomaaliyeed oo Gaariye gudoonsiisey billadda nabada Habeenimadii sabtidii waxaa Heathrow Gate Hotel oo ku yaala galbeedka magaaladan London lagu qabtay xaflad si aad u heersareysa loo soo agaasimay, oo ay soo qaban-qaabiyeen ururo ay hormood ka ahaa, ururka Raad laguna maamuusayey abwaanka weyn ee Maxamed Xaashi Dhamac ( Gaariye) Xafladan waxaa ka soo qaybgaley dadweyne aad u farabadan oo soomaaliyeed kuwaas oo kala yimi goobo kala duwan, dadweynahaas oo isugu jirey Siyaasiyiin, Culimaa’udiin, Saraakiil iyo xubno ka tirsan dhamaan bahweynta afka soomaaliga ku hadasha ee ku filiqsan wadankan Britain gaar ahaan inta danaysa aqoonta, afka iyo dhaqanka ummada, oo uu hoddan ku yahay macallin Gaariye. Fawzia Yuusuf X. Aden oo iyadu madax ka ah Xarunta Cilmi Baadhista Soomaalida ayaa waxay si mug leh ugu mahadnaqday Abwaan Gaariye iyo dhamaan marti sharaftii goobtaasi joogtay iyada oo ku hadlaysay magaca Xarunta Cilmi baadhista iyo gudiyada qaban-qaabada. Intaa kadib Fawzia waxay gudoonsiiyey Gaariye Billad sharafta nabada oo ay bixisay Xarunta Cilmi Baadhistu, waxaanay xaruntu sheegtey in uu Gaariye billada nabada ku mutaystay dhiiranaanta badheedhihiisa, mabda’a adkaantiisa iyo isaga oo maalintay ay xaaladu meel adag shanshada dhigto adeegsada maansada kuna suntan danta ummada iyo himilada bulshada. Xarunta Cilmi Baadhistu waxay kale oo Billad sharafta horumarinta gudoonsiisay Ayaan Maxamuud Maxamed Cashuur oo iyana ku mutaysaty U heegnaanta horumarinta ummadda Soomaaliyeed. Intaa kadib waxaa hadalka la wareegay Maxamed Xaahi Dhamac Gaariye oo saacadii ugu horeysay ka hadlaayey quruxda afka Soomaalida, Gaariye waxaa uu si aan qadaf lahayn u tilmaamay anshaxa, asluubta, hufnaanta, asadoodanka, hormeynta, gudboonaynta, astaamaynta, dhaabadaynta, abaarka nuxurka iyo yool adeegsiyadii afmaalada Soomaaliyeed dhinacayada maansada. Waxaa uu Gaariye ku nuun-nuuxsadey siyabaaha kala duwan ee afmaaladu u adeegsan jireen tixda kuwaas oo aynu ka milicsan karo. Collaada, nabada, guusha, himilada, guuldarada, jacaylka, nacaybka, ducada, habaarka, guhaanka, farxada, qoomamada, dhalsahada, dhimashada, abaalka, abaal dhaca, quruxda, qayayaabka, gobanimada, faanka, hiifka, haaraanka, ayaanka, ayaan darada, barwaaqada, abaarta, garta, garadarada, godobta, xaq dhawrka Iwm. Inkasta oo aan in badan lala wadaagin Gaariye hadalka, Dadweynaha madasha ku sugnaa ayaa waxay ku muujinayeen falcelintooda qosal, sacab, mashaxarad iyo qiiro laga akhrisanaayey foolashooda ama wejiyadooda. Dhawr telifoonada gacanta ah ayaa ka qaylinaayey goobta, waxaanay dadweynihii sitay ii sheegeen in ay tahliwaayeen in ay damiyaan, sababtoo ah waxay ka cabsi qabeen in wax dhaafaan, sekenada ay ku jeesanayaan daminta telifoonada. Marti sharaftii goobtaa ku sugnaa waxaa ka mid ah Dr Martin Orwen oo ah aqoonyahan u dhashay wadankan Britain kuna xeeldheer dhaqanka iyo afka soomaaliga, halkaasna ka akhriyey labada maanso ee Madax Goodir iyo Mandeela oo uu curiyey Gaariye, laguna turjumay afka Ingiriisiga, Martin oo adeegsanaayey siiqad qiiro leh ayaa waxaa uu geysaysiiyey dadkii afka ingiriisiga aan aqoonin in ay dareemaan nuxurka gabayga ka hor, intii aan Gaariye ku akhriyin afsoomaali. Intaa kadib waxaa la gaadhey waqtigii su’aalaha, waxaana su’aalaha ka dhashay in uu Gaariye tiriyo raxan ka mid ah gabayadiisii, isla markaana uu ka sheekeeyo qisooyinkii asalka u ahaa abyida gabayadaas. Dadkii xafladaas ka hadlay waxaa ka mid ahaa aqoonyahan Siciid Jaamac oo hadal kooban oo soo dhaweyn iyo hogga tusaale isugu jira ka soo jeediyey xafladaas, Siciid waxaa kale oo uu ka hadlay sida abwaan Gaariye uu maskaxdiisa, muruqiisa iyo maansadiisaba ugu huro bulshada, isla markaana uu uga dhex muuqdo halganada nolosha oo dhan. Siciid waxaa kale uu si hufan u tilmaamay baddaha tixeed iyo adeegsigooda sida Gabayada, Geeraarada, Masafada, Sal-Salka, Guurowga, Buraanburka, Jacburka, Sitaadka iyo dhamaanba hees ciyaareeda iyo hees hawleedada kala duwan. Siciid waxaa kale oo uu halkaas ka akhiryey tiraab gaaban oo oo uu isagu abyey taas oo uu ku hantiyey dhegihii ka soo qaybgalayaasha. Gunaanadkii xafladaas waxaa markale dadweynihii mahadnaq ku sagootiday Fawzia Yuusuf X. Aden. Allaa Mahad leh Qalinkii Cali Ahmed Raabi Seenyo xigasho: Mareegta Qarannews Soo Bandhige :Fu,aad Bahda Mareegta Farshaxan