Maansada Ammaal Jiiftadan waxaa curiyay Abwaan Maxamed Cabdiqaadir Daauud [Stanza] waxeyna jawaab u tahay suaalaha ka immanaya akhristayaasha suugaanta Abwaanka, gaar ahaan kuwa la xiriira maahmaahyadi cusbaa ee saddaxleeyda ahaa ee uu allifay. Wuxuu Hal'abuurku ku ifinayaa dulucda murtida oraneysa " guur sokeeye waa inaad ka gadooddaa". Ogoowse jiiftadu waa mala'awaale. Waxeyna soo baxday 12/7/2004. Tixdan wuxuu Stanza ku cabbiray waxa ka dhalan kara guur sokeeye oo fashilmay iyo aflagaadada dhidibada aasan karta. Akhristoow ha u qaadan dhacda Abwaanka ku dhacday ee waa sida sare ku xusan mala'awaal, afka qalaadna waa [fiction, not fact] ee la soco dulucda. AMMAAL Ammaaleey Ammaaleey Ammaaleey abbaayooy Anoo ina-adeerkaa Amma ehel dad kuu xiga Abtirsiinadeennuna Meel ku wada aroor tahay Oo aad iigu dheertahay Isir iyo walaalnimo Ayaa lai ambiyayoo Aflagaadda lai baday Hayeeshe'e Ugaasooy Waxaan aarsan doonnaa Ayaantii qiyaamaha. Dab-abuurayaal baa Ina kala irdheeyeen Uurnugul walaashayeey Ina kala asqeeyeen Marna nagu inshaareen Wuxuu uurku ladin karin Marna nagu asteeyeen Af wuxuunan qaban karin Aragtida u rooneey Ma wax loo adkeystaa? Hayeeshe'e Ugaasooy Waxaan aarsan doonnaa Ayaantii qiyaamaha. Dhibka kuwi aloosee Galiilyada abaabsheen Alle wuu arkaayoo Marun bey ku ooljabi Arrinkeygu ma aheyn Inaan gocosho ooyaa Balse ooggi-waaguu Xaley uurku igu yidhi Waa inaad oddorostoo U abtirisa maansada Hayeeshe'e Ugaasooy Waxaan aarsan doonnaa Ayaantii qiyaamaha. Waxaan aamusnaadoon Dibnaheyga awdaba Sidii geel irdhabankii Saqdi ololka reemaba Afgobaadsi maagoon Ammakaag la toosaba Waxaan eed ka cararoon Gacal kala ilduufnaba Saw afgaabsa maan oran Oo afeef ma laasimin Hayeeshe'e Ugaasooy Waxaan aarsan doonnaa Ayaantii qiyaamaha. Nafteydaa la uladubay Waxaan u ololeeyaba Illinta iga gobo'leyn Oogadeyda qoysaba Aqalkaad ku nooshahay Waxaan dabin afmeeraba Sidii hooyo ubadkeed Mudda ku agwareegaba Adna ina-abtaayeey Iimma aad araareyn Hayeeshe'e Ugaasooy Waxaan aarsan doonnaa Ayaantii qiyaamaha. Sidii ubixi nuuraay Noqo ruux adkeysi le' Waxaan kugu agloolaa Asluubtaada gabadhnimo Ukhtii iga yareyd baad Ammaal iiga dhigantahay Dhiiggu waa ka adagyahay Biyo aburinaayaan Waxey ili arkeysuu Aqliguna rummeeyaa Hayeeshe'e Ugaasooy Waxaan aarsan doonnaa Ayaantii qiyaamaha. Ninba agabka xeeshii Murti iyo aftahankii Aniguna abwaannimo Erayada ku faaqiday Adduun laguma waaroo Xaqu wuu iftiimaa Ayaan bey addoomuhu Idil wada kulmaayaan Ammarkuna Allahaweyn U sugnaani goortaa Hayeeshe'e Ugaasooy Waxaan aarsan doonnaa Ayaantii qiyaamaha.